Aban hiah na sim bek inhttp://www.tangkoteute.blogspot.comZOMI FOOTBALL ASSOCIATION (ZOFA) TANGTHU TOM:
Thumasa: Zomi Khangno Kipawlna (Zomi Youth Association-ZYA) kiphut zawh kum 10 cinna (Tin Jubilee) pawipi pen January 2015 sungah thupitak bawl thei ding a hong makaih i biak Topa min i phat hi. ZYA kum 10 cin phawkna dingin Magazine limci khat bawl dingin ZYA makaite in khensatna nei uh a, tua sungah Zomi Football Association (ZOFA) tangthu zong guan dingin ZOFA Committee in thukimna kinei hi. ZOFA Tangthu gelh/ bawl dingin ZOFA a pankhiate' sungah khat akihel le Former General Secretary ahi Sia Khampeek (Tongsan pu) mah ZOFA Committee in muanna tawh kiseh hi.
Kipawlna khat peuhpeuh le mi khat peuh i thu laibu sungah akigelh ciangin, a pianzia bulpi ahi bangbang in gelh ding kisam hi. Tangthu i cih pen mawk pian ngiau theilo or vantung pan kiasuk/ kikhiasuk cih bang zong om theilo ahih manin, a piankhiat a bul abal mahin gelhtheih ding thupi mahmah hi. Tuni a thupiang khat pen zingciang in Tangthu suak akicih bang mahin, hih ZOFA Tangthu zong mai lam khang sawnsawnte hun ciangin Tangthu gil mahmah khat suak pelmawh ding ahi hi. Tua manin ZOFA piankhiat zia tawh kisai zong a pankhiat teng mah i theihna le ZOFA thukhensatna laibupi sung enkak khawmin, aman le adik thei pen dingin kigelhkhia ahi hi.
I. ZOFA Piankhiat Zia: Zomite' khuapi khat ahi Kawlpi (Kalaymyo) khuapi ah Kawl,Kala-Mivom (Hindu),Gualkha, Naga, Mualmite le Chin State sunga om Zosuan namkee tuamtuamte' teenkhopna khuapi khat ahi hi. Tua sungah Zomi (Tedim kampau)te atam pawl hi kha dingin kilamen hi. Tua bangin Zomite i teenkhopna sungah pau le ham (Aw suah) kibatlohna le adiakdiak in biakna pawlpi upzia/ sanzia tuamtuamte in Zominam sungah kipumkhatna le khantohna ding tampi hong khaktan cih kimukhia hi.
Tua banga khantohna ding hong khaktan thei thu tuamtuamte pan Zomite sungah kipumkhatna le khantohna a om theihna ding lunggulhna le veiina tawh Pa Thawng Khan Mang,(Maal suangzaang), Pa Cin Lian Khai, (Tungzang khua), le Pa Thang Sian Kham @ Sia Khampeek (Tungzang khua) te' veiina le ngaihsutna tungtawn in abeisa September 2006 kumin ZOFA kici Zomite Bawlung tawh kilawmtatna hong piangkhia ahi hi.
Amau teng Kimukhawm Den: Hih mi 3 teng sungah Pa Cin Lian Khai bek mah bawlung kimawl ngei le a siam hi in, alawmte nih bel bawlung siam cih thadah kimawlngei hetlo hi uh a, ahi zongin amau veiina bulpi mah bulphuh in kimukhawm in holimna nei den uh hi. Pa Cin Lian Khai pen bawlung siam khat ahihna tawh Bawlung zia gensak a, Pa Thang Khan Mang bel mizot/ mipi kaihkhop (Organized) lam siam mahmah hi. Tua mah bangin Sia Khampeek in a thu le lai lamah akitangsam tuamtuamte banah adiakdiak in ngimna le tupna (Aims and Objectives) cihte khempeuh geel in, amau hihtheihna / siamna kiu khat ciat tawh nisim in holimna nei-in Sia Khampeek te inn ah kimukhawm den uh hi.
ZCFA tawh Amasapen Meeting Kinei: Amau teng thumin hun sawt sim khat sung kimuhna le holimna aneih zel khit uh ciangin, pawlpi tuamtuam pan bawlung uk/siam khangno makaite khat le nih ciat sap dingin Sapna lai (Invitation letter) bawlin Pa Thawng Khan Mangin sam kawikawi in, September 11,2006 ni in Phualpi AG biakinn, Pinlong (8) ah a masa penpen mipi kimuhkhopna (Meeting) kineihpih hi. Tua kimuhkhopna masa (First Meeting) sapna lai (Invitation letter) bawlna dingin Pa Thawng Khan Mang mahin ama sum neih sunsun piakhia hi.
Hih Meeting masapen ah Kipawlna min ding kipsakna kinei nailo ahih manin, amau 3 sung pan Lai le Thu lamah vaipuak anei Sia Khampeek i ngaihsutna tungtawn in Zomi Christian Football Association (ZCFA) cih min tawh sapna lai (Invitation Letter) a mahmah in bawlin Meeting kinei thei ahi hi. Hih Meeting masa tungtang ah bel mi kitamlo ahih manin, Khatvei sapkik ding thukimna kinei-in Meeting kihial bawl hi. Meeting pai khempeuh Pa Cin Lian Khai le Pa Thawngmang in Niangtui le Moh tawh vaak hi.
ZOFA min tawh Meeting Kinei: September 15,2006 ni-in a Nihveina Meeting kisam leuleu in ZCFA min tawh Meeting sungah holimna nasiatak akineih ciangin, ZCFA pen (C-Christian) i kipsak khak mawk le i sanggam Laipiante kihuam zolo kha ding cih muhna le ZCFA (C-Christian) pen lakkhiat ding a tamzaw in thukimna kinei hi. Tua bangin kikupkhopna sung pan Pa Gopu in ama muhna hong pulakkhiatna ah, " Leitungbup bawlung Kipwlna ahi FIFA" tawh aw kaihzia/ lawhzia akibat theihna dingin " ZOMI pan (ZO) lakhia in, FOOTBALL ASSOCIATION pan (FA) lakhia leng tommin lawhna ( ZOFA) hipah ahih manin FIFA tawh awkaih kibang pian ding cihna le sanggam Laipiante dong a huam theihna ding ngimna tawh ZCFA pan ZOFA ci-in a a tamzaw thukimna tawh kipsakna kinei hi.
ZOFA Committee Kiteelkhia: Hih a (2)veina Meeting September 15, 2006 ni-in Amasapen ZOFA Committee anuai abangin kiteelkhia hi.
President - Vial Khan Do (Tahan Baptist Church)
VicePresident - V.C Mang (Paangpi SDA)
General Secretary - Sia Thang Sian Kham (Evangelical Baptist Church)
Assistant Secretary - Pum Khan Cin (Leipi Baptist Church)
Treasurer - Sia Kham Do Dal (Emmanuel Baptist Church)
Accountant - Cin Lian Khai (Phualpi AG)
Organizer - Thawng Khan Mang (Bethel ZBCM)
Note: Pawlpi ciat pan Team Captain khempeuh Member hipah hi.
II. Ngimna le Tupna: ZOFA in ngim le tup kician kinei in sep masak ding le sep zom ding cihte anuai bangin kinei hi.
(1) Kawlpi pan kipan Zogam, Zaanggam le Kawlgam sung mun tuamtuam Zomi khempeuh kimawlna (Sport) tawh kipumkhatna ding.
(2) Zogam khua khempeuh le pawlpi ciat ah kimawlna lam (Sport Department) neih zawhna ding.
(3) Zomite sungah mipil, mi hau le mi minthang le minam it khat peuh min tawh kumsim in ZOFA Cup kilawmtatna nei ding.
(4) Zomi Tualpi (Zomi Stadium/Play Ground) le Zomi Innpi (Zomi Community Hall) mun dingin Kawlpi khua sung leitang Acre 10 nei ding.
(5) ZOFA ciang bek hiloin Kimawlna namkim kipawlna Zomi Sport Assciation (ZOSA) ciang nei ding.
(7) ZOFA in hong uk kumpite deihna le thukhun a hi ” Kawlgam kimawlna in leitungbup zel ding” cih thukhunte thukimpih ding.
III. ZOFA Sep Masak Ding: ZOFA ngimna le tupnate sung pan sep masak ding maban lianpi khat akinei ahi Zomi Tualpi (Zomi Stadium) le Zomi innpi (Zomi Community Hall) ading leitang Acre (10) lei ding vai kikupna November 24, 2007 ni-in, Emmanuel Baptist Church, Pinlong (9) ah pawlpi 65 pan Pastor, President le Secretary mimal 70 te in a (1) veina thukikupna thupitak kinei hi. Tua thukhensatna pan Kawlpi khua sung aa om Zomi (Tedim kampau) Biakna pawlpi khempeuh a inn phazah zui-in, sehtan sum donna neih dingin mipi thukimna tawh anuaia bangin sehna le kipsakna kinei hi.
Group (A) Inn 200 tung siah -Ks. 300,000/-
Group (B) Inn 100-200 kikal -Ks. 200,000/-
Group (C) Inn 50-100 kikal -Ks.100,000/-
Group (D) Inn 20-50 kikal -Ks. 50,000/-
Group (E) Inn 20 nuai siah -Ks. 10,000/-
IV. ZOFA Fund Raising Committee Kiphuankhia : ZOFA leitang leina ding sum bul zong pawl (Fund Raising Committee) a nuai a bangin kiseh hi.
SK. Gin Khan Pau - Convenor - 1
Hang Lian Khup - Convenor - 2
Rev. Pau Khan Khai - ZBCM
Thang Suan Mung - Tahan EFCM
Michael Suan Lian Pau - Tahan RC
Bo Zam Kap Lian - St.Mary RC
Siapi Kung Za Mung - Ciimnuai Pilna Sawm (Direcotor)
Siamah Dai Khawm Ciang- LCEC (Director)
Siamah Luan Dim - LCCI (Director)
Hang Lian Thang - Leipi Baptist Church
Thawng Khat Thawn - Tahan Baptist Church
Ngul Do Tuang -Leipi Baptist Church
Gin Do Thang - Sing Unau Siyin Baptist
Khai Deih Tuang - Laipian pawlpi
Peter Mung - President, Munlai Zomi Christian Youth Fellowship (MZCYF)
Note: ZOFA Committee khempeuh Fund Raising Committee a kihel hipah hi. Hih ZOFA sum bulzong pawl (ZOFA Fund Raising Committee kiseh pah a, 2008 kum bul pan kipan in Kawlpi khua sung a pawlpi inn zui sehtante le muanzaw deuh mimal sehtan kisehte kaikhawm pah hi. Sum ngah masaksak Myanma Economic Bank ah ZOFA Committee Sumkempi min tawh kikoih pahpah dingin thukimna kinei hi.
V. Mimal Sehtan piakna: ZOFA min tawh Zomi Tualpi leitang lei nadingin Kawlpi khua sung a om Zomi mimal muan zaw deuhte tawh Dec 4, 2007 ni in Galilee AG biakinn, Pinlong (8) ah thukikupna kinei a, mimal 100 valin upna kamciam le sehtan sazian le sum tang mahmah tawh kipiakhia pah hi. Tua mimal sehtante le kamciamte pen May 31, 2008 (Khatveina) le June 30, 2008 (Nihveina) tawh piak dingin khensatna kinei hi.
VI. Gam dang lam Huhngetna ding vai: Zomi leitang Acre (10) leina dingin Kawlpi khua sung aom pawlpi tuamtuam leh mimalte tungpan sehtante akikaihkhop zawh ciangin gamdang a om Zomi Innkuan kipawlnate khempeuh ah ZOFA min tawh laikhak-a huhna nget ding thukhensatna kinei hi. Tua banga gamdang lamte tawh kizopna dingin Zomi Innkuan makaite le agam khen zui-in Consultant kikoih hi. Ahun zui in Consultants kikoihto zel ding thukimna kinei hi.
CONSULTANTS
Paul Khaipu - Australia
Cing San Aung - USA
Pau Khan Thawn - Singapore
Sia Khampeek - Europe
Sia Thang Sian Mung - UK
Kam Za Pau - Autralia(Perth)
Kam Hau Pau - S.Korea
ZYA le ZOFA Kigawmna Thu:
I theihsa ciat mah bangin ZOFA in Ngimna tup kiciantak nei-in kiphuankhia ahi hi. Tua ngimna le tupnate' sung pan a thupi penpen ahi Kawlpi khua sungah pu le pa hun akipan i neih zawh ngei nailoh Zomi leitang Acre 10 tungah Zomi Tualpi le Zomi Innpi thupitak neih zawhna ding ngimna ahi hi. Tua banah Zomite sungah kimpumkhatna le a om semsemna dingin Kumsim in ZOFA Cup kimawlna neih ding cih hi a, tua mah bangin ZOFA Cup a khatveina akibawl ciangin Zomibup in hoih kisa bek tham loin, Zomi sungah kilawmtatna le kipumkhatna lungsim thak hong piang khia takpi cih mitmuh in hong kilanghkhia pah hi. ZOFA Committee te zong kilawm le tha kingah semsem banah mipite zong kilawp mahmah a, Kum khat kumnih sung bekbek in ZOFA in mipite lungsim luah ta hi.
Tua banga manawtna le mipite' lungkimpihna a om semsem ciangin, ZOFA Committee le ZYA Committee te kimuhkhopna kinei hi. Tua kikupna sungah ZOFA i cih pen Kimawlna namkim taktak hilo a, Bawlung bek hi lai phot ahih manin i mipite thapiakna le ZOFA i maban ngimnate a kipzawk/ tangzai zawkna ding ngimna tawh ZOFA in ZYA tawh kigawm dingin (August--2008) ni-in Committee nihte kimuhkhopna kinei thei in, a tamzaw thukimna tawh ZOFA in ZYA tawh kigwmna kinei hi.
Tua banga ZOFA le ZYA akigawmna ah kizopzia le kalsuanzia ding cihte thukimna zong limtak kibawl pah hi. Tua thukimna le thukhensatnate in: (1) ZOFA pen ZYA sungah Sport Association Department khatin tu le mailam dongah om suaksuak ding hi. (2) ZOFA Committee zong atuam in om den ding a, ZYA Committee in sunglut in vaisaina le ukcipna nei theilo ding hi. (3) Ahi zongin Ngimna tupna le sep ding vai liante ah ZYA Committee mah tawh mapang le vaihawm khawm ding hi. (4) ZYA i Kawllukhu nuai ah om ahihna tawh laigelhna le kipawlna zumlai lailu (Letterhead) ah ZYA pen laimal neu zaw tawh tungnung sakin, ZOFA pen laimal lian/ gol zaw tawh nuai nung sak dingin Committee nihte thukimna kinei hi.
( Note: Hih zong Kigawm ni le thukhensatnate akituaklo om kha ding ahih manin, ZOFA Thukhensatna laibupi ah kiciantak na enkik un. By: Sia Khampeek)
VII. ZOFA Cup (1) veina: ZOFA ngimna le tupnate sung pan Zomite kimawlna tawh kipum-khatna dingin a (1) veina ZOFA Cup pen October 30 – November 17, 2006 sung Tahan Tualpi (North) ah kinei in pawlpi/team16 kihel thei hi. Anuai abangin agualzote pahtawina kinei hi.
A Khatveina ZOFA Cup 2006 Result:
First - Tahan Baptist Church
Second - Tahan R.C (CYA)
Third - Kalay E.B.C.
Fairest - Kalay E.B.C.
Note: ZOFA Cup a (1 )veina letsong piakna le ZOFA Concert gawmin Nov 18, 2006 ni-in Emmanuel Baptist Church,Pinlong (9) ah thupitak kibawl hi.
A Khatveina ZOFA Cup 2006 Pahtawina piate:
Pa Kham Lian Khai - 1st prize te pia - Ks.50000/-
Pi Goih Za Niang - 2nd prize te pia - Ks.30000/-
Pa Gin Suan Khup - 3rd prize te pia - Ks.20000/-
ZCTS Laisiangtho sang - Asiangthopen - Ks.15000/-
VIII. ZOFA Cup (2) veina: ZOFA ngim le tup tawh kizui-in, a (2) veina ZOFA Cup 2007 pen Oct 29 – Nov 16, 2007 sung Munlai Tualpi le Tahan Tualpi (N) ah kinei a, pawlpi or Team (18) kihel thei a, a nuai abangin agualzote pahtawina kinei hi.
First - Tahan Baptist Church.
Second - Leipi Baptist Church,
Third - St. Mary Church
Fairest - Kalaymyo Baptist Church
Note: ZOFA Cup a (2) veina letsong piakna le ZOFA Concert gawmin Nov 18, 2006 ni-in Emmanuel Baptist Church, Pinlong (9) ah thupitak kibawl hi.
ZOFA Cup 2 veina ah Pahtawina piate:
ZOFA Committee Cup -1st prize –
Pa Kham Lian Khai -2nd prize -
Pa Thang Nang -3rd prize -
Pa Khan Do -Asiangthopente
Pa Khai Deih Tuang -Asiampen Nam 6 teng
IX. A (3)veina ZOFA Cup 2008: A (3)veina ZOFA Cup pen SingUnau tualpi ah kinei a, anuai abangin a gualzote pahtawina kipia hi.
A Thumveina ZOFA Cup 2008 Result
First - St. Mary Church,
Second - Leipui Siyin Baptist Church.
Third - Word Family Church,
Fairest - Tahan R.C (CYA)
X. A (4)veina ZOFA Cup 2009: A (4) veina ZOFA Cup pen SingUnau tualpi ah kinei a, anuai tengin pahtawina van le letsongte piakhia uh hi.
ZOFA Cup Donors:
First Prize - Sia Do Khan Khup (OM Sport Ministry - Yangon)
Second Prize - Pa Cin Khan Hau (Norway)
Third Prize - Pa Thang Lian Khual (Shwe-nesat Cargate, Kalaymyo)
Fairest Prize - Pa Kam Za Pau & Family (Australia)
Single best player - (A pia nuam ten kipia thei lai hi.)
----------------------------------------------------
Note: ZOFA Cup 5 veina pan a tungsiah khempeuh Tulaitak a ZOFA Committee in Laibupi sunga ciamtehna bangin na zoptoh dingun kivaikhak hi hang. Hih a nuai a ( Tulaitak ZOFA Committee cih zong man/dik nawnlo kha ding ahih manin, Committee mahin na en pha un. Lungdam. (By: Sia Khampeek)
-------------------------------------------
XI. Tu laitak ZOFA Committee:
President - Vial Khan Do (Tahan Baptist Church)
Vice President (1) - Vungh Za Khup (Paangpi SDA)
Vice President (2) - Cin Khan Lian (Tahan Baptist Church)
General Secretary - Kam Suan Mung (Kalay Baptist Church)
Asst. Secretary (1) - Pum Khan Cin (Leipi Siyin Baptist Church)
Asst.Secretary (2) - Anthony Khai (Tahan RC)
Treasurer - Kham Do Dal (Emmanuel Baptist Church)
Asst. Treasurer - Thawn Za Tuang (Kalay EBC)
Organizer - Thawng Khan Mang (Bethel ZBC)
Finance Secretary - Vung Sian Tuang (Galilee AG)
Information - Mung Khan Suan (Kalay EBC)
MEMBERS:
Tuang Do Hau - Tahan RC
Go Khan Lian, - Tahan Baptist Church
Cin Do Thang - Sing Unau Siyin
Cin Sian Pau - St. Mary RC
ADVISORS:
Kham Lian Khai - Galilee AG
Gin Suan Khup - St. Mary RC
SK.Gin Khan Pau - Bethel ZBCM
Khai Deih Tuang - Laipian pawlpi,Tahan
Go Lian Mang - Agape AG
Gin Khan Pau - Kalay Baptist Church
Rev.Fr.Martin Mung - St.Mary RC
Langh Za Khai - Zo Baptist Association
Thawng Za Suan - Tahan Baptist Church
Dr.Gin Khan Khual - England (UK)
Pau Khan Thang - S.Korea
( Note: Hih Committee te pen ZOFA Tangthu gelh Sia Khampeek i khualzin khit ciangin kilaihna pawl khat om kha ding ahih manin, Magazine Committee in etkik ding kisam kha ding hi.)
XII. ZOFA Nasepna Theihbehnop Aneite leh Kizopna Ding munte:
Pa Vial Khan Do (President), Kawlpi-Tahan
Sia Khampeek ( Former Secretary & EU Consultant)
khampeek@gmail.com, Tel: 0047-46824269
Kam Suan Mung (E-Mung)
General Secretary (Present)
layseihmung@gmail.com, tuailai@gmail.com
Tel: 0095-073-21296
Kham Do Dal (Sia Daltawng)
khamdodal@gmail.com
Traesurer (ZOFA)
------------------------------------------------------------------------
Note: ZOFA Committee lawm le gualte,
ZOFA Tangthu gelh dingin nong sehna uh tawh kizui-in, kei theihna bangbang in hong gelhin tun hong khak thei pan zen ing. ZOFA Cup tawh kisai kei (Sia Khampeek) om lai ciangciang bek hong gelh thei ka hih manin, kumsim a kizomzom in na gualh toh ding uh ci ni. Tua banah kei gelhzia pen ka telcianna tungtawn vive tamzaw a, adiakdiak in a ni le kumte thukhensatna laibupi sungah na etkik ding uh cih huhna hong ngen ing. ZOFA kipatzia tawh kisai bel ahi bang linlian a kong gelh ahih manin, phiat/ hepkhiatna cihte zong kisam nawnlo dingin kilamen hi hang. Kisapna om le kithuza toto ni. Ka lungdm. (By: Naseppih, Sia Khampeek)
