Jesu pan bek hotkhiat na ki ngah.

SINNA 20 - JESU PAN BEK HOTKHIATNA KINGAH  ​ Thupatna: Pasian' thukham in bang hong ngen hiam cih ih sin khin zo hi. A tawntungin kipin kikhel ngei lo a hih lam zong ih thei hi. Leitung buppi ah thukhenna-a a kizang ding piciang a hih lam zong ih thei hi. Thupiak Sawmte khatkhatin ih sin khin hi. Tawntung nuntakna ka neihna dingin bang hih ding ka hiam ci-in khangno khat in Jesu dong ngei hi. Thupiakte a zui dingin Jesu in amah sawl hi. Ka khantawnin zui khin ing, ci napi-in khangnopa gammang hi. Bang kisam hiam? 1. Thukham zuihna in tawntung nuntakna hong nei sak ding hiam? Galatian 2:16. Theih ding: Thupiakte zuihna in tawntung nuntakna hong nei sak lo ding hi. Bang hang hiam cih leh bang zahta-in ih hoih ta zongin, ih palsatna mawhna khat nangawn tua in phiat zo ngei lo ding hi. 2. Hotkhiatna ih ngah na'ng lametna khat bek a om pen bang hiam? Sawltakte 4:12. Theih ding: Mihing' sep hi lo-in Jesu' sep bekmah in man a nei a hihi. 3. Pasian' lungsim bang pen in hotkhiatna piang sak hiam? Ephesian 2:8,9. Theih ding: Mawhna khat nangawn a mai na dingin eite in ih hih theih bangmah om lo a hih manin, ih mawhna a maina ding leh Ama gam sung ih tun theihna ding pen Pasian' hong hehpihna bekmah a hihi. 4. Tua a hih leh Pasian' thukham kisam naw lo, cihna a hi hiam? Rome 3:31. Theih ding: Pasian ih up semsema, ihna tawh ih mawhnate hong mai sak manin ih lungdam semsem ciangin, Ama thukham zuih nopna lungsim ih nei semsem ding hi. 5. Tua a hih leh hotkhiatna ah thukham bang mun ah pang hiam? Rome 7:7. Theih ding: Thukham in Pasian' deihna bang hiam cih hong lak hi. Eite khial maw, khial lo cih hong kimu thei sak hi. Khialhna nei ih hih lam ih kiphawk ciang bekin Honpa ih kisap lam kiphawk thei hi (Rome 3:19,20). 6. Pasian' hehpihna tawh a mawhna a kimaii sak mi in thukham palsat thei ta ding a hi hiam? Rome 6:15. Theih ding: Thukham palsatna khatvei hong kimai sak khit ciangin ut banga palsat theihna ding thu a kinei hi tuan lo hi. Singlamteh tunga Jesu hong sihna hangin mawh maina a ngah thei ih hihi. Mawhna ih bawl teitei ciangin Jesu' sihna a zahkoko ih suak hi. Jesu hong sihna ih lungdam takpi leh mawhna a hi thukham palsata ih nei nuam nawn kei ding hi. 7. Pasian' thukham leh mawhna a mai sak hehpihna a kizop dan Lai Siangtho in koici gen hiam? Jacob 1:23-25. Theih ding: Thukham pen nin banna a hong lak thei limlang tawh kigenteh hi. Jesu' sihna in a hong lahkhiat Pasian' hehpihna in ih mawhna hong silsiang hi (Mangmuhna 7:13,14). Thukham in hong silsiang thei lo hi. Jesu' hong silsiang sak ding kisam ih hih lam hong lak thei bek hi. A nihin a kisam a hihi. 8. Tatkhiatsa mi siangthote in thukham leh hotkhiatna lungdamna thu bang cih ding uh hiam? Mangmuhna 14:12. Theih ding: Pasian' thukham leh Pasian' hehpihna ton khawm den a hih lam hih Lai Siangtho in hong lak hi. 9. Pasian in A thukham bang cih sawm hiam? Hebrews 8:10. Theih ding: Ih lung sungah Kha Siangtho hong omna tawh Passian in A thukham ih lung sungah hong guangin, ih lungtang tungah hong gelha, tua hangin Ama deihna pen ei' deihna hong suak hi. 10. Pasian' vangliatna ih sungah hong oma, mawhna bawl lo-a ih om ciangin, ih upna koi bangin kilang khia hiam? Jacob 2:14-18. Theih ding: Pasian' thukham pen hotkhiatna ih ngahna ding, Ama maipha ih muhna dinga ih zuih hi lo-a, ih sunga a om Pasian' Kha-i gamtatna hi zaw hi. Thukham zuihna in hotkhiatna ih ngahna ding hi lo-a, hotkhiatna ih ngah mana ih nuntakzia hi zaw hi. 11. Ki-itna leh thukham koici kizop hiam? Rome 13:10. Theih ding: Pasian in ei hong it mah bangin eite in Amah ih it ciangin thukham' deihna a kicing sak ih hihi. 12. Pasian in mi khempeuh hong koici sap hiam? Hebrews 4:16. Theih ding: Pasian' thukham in Ama gam kiphuhna khuambul a hihi. Satan in tua thukham do hi. Pasian in A thukham a khel sangsikin, mihing in a palsata hanga daan a thuak dingin leitung ah A Tapa hong pai sakna tawh A thukham a thupina hong lak hi. Pasian' thukham kiphiat lo a hihna tua in hong lak hi. Thukham zuihna in Pasian' maipha hong mu kik sak tuan lo hi. Thukham palsatna hanga kisikkikna ih neih ciangin, Pasian' hong itna in eite hong zamin, a maipha hong mu kik sak hi. Tua thu hanga ih lungdamna leh, ih lung sunga om Ama hong itna hanga Ama thukham a zui nuam ih hihi. -- Sya Kappi Christian Literature Ministry & Video Ministry 104 woodmont Ave, Apt B8 Bowling Green, Kentucky state, KY 42101 USA

Comunication nazat siam hiam?

Thupatna: Communication pen leitungah a thupi mahmah khat hi-a, Communication ahoih, a hat, asiam, innkuan le minam, gam khangto hi. Nasep hoih ngahna ding, zakhan nading in zong, kisam mahmah hi. Mi pawlkhatte laipil mahmah, a degree uh zong sang mahmah napi-in nasep hoih, nasep nuam, a muzolo, a ngah zolo, a zakhang theilo gam khangtote ah tam mahmah hi. Tua pen Communication a siamloh man, ahoih loh man hithei hi. Tangval pawlkhat a mel uh hoihkhollo, bang mah zong nei khollo, hi thingtheng sim zezen, mihau, miliante tanu nungak melhoih pipi, Lengtong Hoih bang a, ahoih olno tak in ngahthei uha,, nungak pawlkhat leuleu zong, a sam bang buahpian niniai, a mel uh zong, hoih khollo napi’ un, lengla tampipi khawl in, tangval melhoih pipi, Mun Neih Thang Dal banga tangval melhoih ngahthei mawk uh hi. Bang hang? Communication asiam man uh hilel hi. A khangto gamte ah degree neih ciang bek tawh nasep muzolo mi tam mahmah a, a khangto nailo gamte ah bel degree sang theithei thupi kisa hi. A khangto gamte ah bel skill tuamtuam siamding na thupisak zaw uh hi. Tuate sungah Communication skill pen thupi sakdiak hi. Gal kidona ah zong Communication ahat te, ahoih te mah in galzo hamtang uh hi. Tulai US leh leitung I buaipih mahmah khamul saute bang, Communication a siamluat, a hatlua manun galhat uh hidih mawk hi. Tu hunteh Politic (Nainganzi) lam ah zong, President, Priminister, MP etc, te aki tel ciang leh kitelna thupi khat peuh aom ciang, communication asiamte, a hatte mah in pan mun ngah hamtang uh hi. Tua ahih leh Communication I cih bang hipeuhmah mawk hiam, Zomite Communication I siamta hiam, cih tawm kikum sukdih hi. Communication kammal pen Latin kam panin hong pai hi-a, Verbal Communication, Non-Verbal Communication leh Written Communication in khenpi thum in khen uh hi. 1. Verbal Communication: Verbal Communication I cih ciangin, maitang kimu a kiho, ki kumkhawm cih bang dan, Phone pan, Skynet pan, VZO pan leh Radio, TV leh Media tuamtuam pan a kam tawh ki honate Verbal Communication kici hi. Nidang in ah hici bang ki honate pawlkhat, mukhalo, lawngkhalo, zang ziahziah khalo hi mahle hang, tuhunteh Technology hangin olno tak in I ki hotheita hi. Ut in utta keileng hite I zat loh hong phamawh ahih manin tuhun pen mi pawlkhat te’n Collaborative Technology naci liang uh hi. Collaborative kammal pen Latin kam pan-a, hong pai hi-a, “connect with somebody or other people” eipau in a tomin genleng, mi dangte tawh kizom, ki ho cihna ahi hi. Technology kammal pen Greek kammal pan a, hongpai hi-a, techne leh logio kigawm ahi hi. Techne cih ciangin nasepna khat peuh ah "vanzat siamna," thazung, thatang sanke, khua-ul sisan luangke kullo a, van, khuak zat siamna, hi-in logio cih ciangin "theihna sinna," ahi hi. Tua hi-a, Collaborative Technology I cih ciangin, a tomin genleng, mi dangte tawh olno tak, baihlam tak a, ki zopna, ki hona cih a gennuam ahi hi. Tua ahih manin mi tawh I ki hoteh, Interview khat peuh I paiteh a thupi mahmah pawlkhat in: · Listen and feedback - I lawmte thugen ngaimasa phot in tua khitteh dongh kik or genkik pan ding. · Respect for other opinion - Mi dangte ngaihsutna, mi dangte thugen zong zahtak sak ding, cih ahi hi. Hong ki hopih napi-in awl mawhlo, thusimlo, limtak dawnglo, cih banga, om loh ding ahi hi. Thusia gen ding ahih kei buang leh na lawmte’n hong hopih laitak, hong phone laitak na mankei leh zong limtak gen a, phone kik ding thupi hi. Thusia khawng peuh ahih leh bel kam kidop kan omlo hi. · Etiquette - Thukhat peuh na genteh kamkhum tak, siangtak limtak, polite tak a gending cihna ahihi. Tulai Zomita dingin maitang kimu a kiho leh Phone tawh ki ho mi namdangte bangin ki zangsiam nailo ahih manin thupi diak hi. Mi tawh I ki ho ciangin, interview I paiciang, kician tak in thugen in I lawmte thugen zong zahtak sak, limtak ngaihsak in tua khitteh a kiciat kei leh limtak siangtak in dongkik genkik ding thupi hi. Mi pawlkhat te'n a lawmte, a ki kuppihte,a seppihte thugen ngai nuamlo in ama utteng gengen in ciahsan, a phone khaksan, hun khaksak ziau cih bang om thei uh hi. A dangte thugen ngai nuamlo in amau thugen 100% ki mang leh ut mawk thei uh hi. Zomi sungah zong, tuaci bang sia, upa, makai I om manin, tawmtaleng, ki khenkhen hi hang. Tua ahih manin mi tawh na ki hoteh, meeting khat peuh na neihteh, Interview khat peuh na paiteh nang a bekbek ci tentan kenla, mi dangte ngaihsunna zong, zahtak bawl in sangsiam in. Lai Siangtho in zong, khat le khat ki zahtak ziading, ki thusim ding hong hilh khin hi. A zuisiam, a zanghsiam minam leh gam ki pawlna peuhmah khangto ding hi. 2. Non-Verbal Communication: I cih ciangin, pumpi ki hekdan, ki hek zia, ki mithek, ki zawl mite giau, ki mukpik cih dante pawl leh nikten puansilh, omdan khawldan, mi omdan ciinna, a gimnam a ki theisak cih bang dan a tuamtuamte pawl ahi hi. Mi pawlkhat pil mahmah, thei mahmah, a melbang pong piannong, a kam zong siamke, ahih hang, Non Verbal Communication zatsiamlo, theisiamlo uh ahih manun lawmding leh naseppih dingin ki deihlualo thei hi. Tua ahih manin mi lak-ah I omteh, mi tawh I ki ho I ki thuahteh, omdan khawldan zong, eima innsung leh I khua I tui a, I omlai dan a, om gawptheih hong hikhinlo hi. Mi namdangte tuaci omtah, ci-a, omgawp mawk a, na ciinsawm leh lunggimna lianpi, lawhsapna lianpi na ngahthei ding hi. I paunak khat ah “sakhi in zong a tatnang kuam kua khual, buipi leikei in zong khua ngai” I cihte pen minam khangtote lak-ah zong na thupi mahmah hi. Ei Christian te zuihding ahi, Lai Siangtho in zong, biak innsung leh mun tuamtuam ah I gamtat luhek ziading, I niikten puansilh zia ding hong hilhkhin hi. 3. Written Communication: Laigelh a tua tawh ki hona, laikhak in Laito pan ahi zongin, Email pan, Phone pan, Face book pan, Viber pan, Twitter pan, Laibu pan, Magazine pan, Internet leh Media tuamtuam khat peuhpeuh tung tawn pan laigelh a, ki hona, thu ki zaksak na pen Written Communication naci uh hi. Internet aki zatma in laigelh a, thu khat peuh I ki zaksaknopteh, a kha asim sawt thei hi. Zomi French paite bang innlam lai akhak uhteh, ni tampi asawt ban-ah guahzu, meikai thuakkha gawp ahih manin a laibang vul ning niang in, amal zong a mualgawp pawlkhat omta a, simhak simsim hih tuak hi. Thuhoih mahmah gelhnapi hangin I laigelh a simdingte lampan in ana kitel kei mawk leh thasup huaisim hi. Nasep na zong ciang, company khat peuh tawh na ki zop ciang, ki pawlna khat peuh tawh na kizop ciang, lai gelh loh pha mawh hi. Laigelh nasiam leh na sepna ah na lawhcing ding hi. Mi khat peuh in lai hong khak leh zong a mi na theih nak leh limtak thuk kik tangtang ding thupi hi. A mi na theih kei leh bel tulai pen lauhuai thei hi. Gamkhangto, minam khangto aki etteh, a laigelh dan uh leh laibu bang zah bawlkhiata uh hiam, Media lam bang aci uh hiam, cihte ki en dih mawk hi. Tua ahih manin Zomi te’n zong lai tampipi I gelhding, laibu tam pipi I bawl zawh ding zong, hong thupi mahmah ding hi. Tulai Zomi te’n Written Communication in Internet group mail te pan Email, Facebook, Viber etc, ki limzat pen phial in ka um hi. Internet thu tomcik khat genpak leng, Internet kammal pen Latin kam panin hong pia hi-a, NASA galkapte in 1950-1970 in hong bawlkhiat uh hi-in, a mausung bek a zatding in abawl uh kici hi. Ahi zongin kum 1980 khitteh mipi, tangpi hong zangsak uh hi. Ahi zongin Zogam leh Zomite sungah kum 2000- 2010 kikal in hong kizel pan hiaihiai kici thei hi. Leitung khantoh na Communication tawh kisai kum 20, 30 khitteh Zomite hong lawngkha pan, Zomite sungah mun hong luah pan cih theih phial hi. Tua ahih manin tulai khangthak te’n I theihding ah, Written Communication group khat peuh I bawldingteh, minambup, minam ki pawlna or ki pawlna khatpeuh zatding I cih leh thukhun limtak in nei a, tua thukhun pen member ding peuhmah in thei masa phot ding, tua khitteh aki zawh uh leh member in lutsak pat ding ahi hi. Thukhun neilo or tua thukhun a member dingten zong thei masalo in member a sangpah, ahih kei leh amau phalna omlopi a, amau number or address I guansak ziauziau mawk leh a thuneu pen in thusitna leh sumliau na ki thuakkha thei hi. I biakna Pawlpite leh I ki pawlnate I ki khenkhen sak bangin leitungbup Zomite ki zopna Written Communication group te zong a kumkum in athak hong ki bawl beh den phial mawk in, a member teng leh a thu ki suahteng lah ki bang veve ahih manin thukhun kician neilo I hi hiam, ahih kei leh Internet Law theilo I hi hiam, cih ki etphat huai hi. Thu ki suahteng ki bang veve ding ahih leh athak bawl behbeh nawnlo in, a omsateng limtak I puah theih ding thupi kasa hi. Thukhupna: Ei sanga u zawte, pilzawte, siamzawte, makaite I lawmte zahtak hona, zahtak bawlna zong Communication hoih mahmah khat ahi hi. Tuaci bangin bawllo in eima dinmun ki tellopi, a maute I va haibawl, I va mawk hawmthawh mawk a, eima muhdah khatpeuh, eima hoih sak loh khat peuh I lawmte khempeuh muhdah theih ding leh a minsiat theih na dingin I va bawl khak leh tua zong a lauhuai mahmah leh ahoihlo mahmah Communication nam khat ahi hi. Thukhat peuh I genteh, I suahteh a taktak ahih ding thupi pen hi. Mi dangte thugen limtak zahtak sak a, Namtal in “Phucil Phucil khau na zun ouh,” a cihteh Phucil in Neino a deih manin “sattat ding e,” ci-in, a thugen aleh lamin la-in akhau ana sattat vial leh amah in haksatna thuak lawh zawsop hi. Na khatpeuh I sepkhopteh Communication thupi mahmah ahih lam, Phuicil leh Namtak tangthu in zong hong phawk sak hi. Mihing kician khat in I pian leh Communication tawh ki pelhtheilo I hih manin Communication a zangsiam, gam leh minam khangto in, a zangsiamlo leh a zangkhial gam le minam khangsuk hi. Communication a zangsiam I hih ding hanciam ciatni. Note: Zomi Innkuan Brisbane makaite in Sialsawm Pawi 2016 in Communication tawh kisai thugen dingin hong seh uha, tua hun a, ka thugen puahpha a, Zomi bup simtheihding in kong suah ahi hi. Khaibawi

Thu mana na leh cih tak na

THUMANNA (OBEDIENCE) Bucinlohna leitung a Khristian nuntakna-ah a kisam leh a poimawh mahmah Pasian thumanna ahi hi. Pasian thumang, Pasian thu banga nungta cih ciangin thu tampi om thei ding a, Pasian thu tawh kituak a nu leh pa, sia leh makaite thumanna zong kihel ding hi. Lai Siangtho sunga Khristiante nuntakzia ding a kigelh banga kalsuanna leh, Lai Siangtho sung a mihangsan paimasate leh Pasian in a teeltuam minam Israelte tangthu panin zong thumanna manphatna tampi muh theih leh sin theih om ding hi. Tuate laka khat, sehnel gam sunga Israel mite nuntakzia panin sin theih leh etteh theih ding pawlkhat om dingin lamen ka hih manin tuate kong luikhia hi. Meii leh meikhuam Israel mite pen Izipt pan a paikhiat zawh uh kum nih khit ciang, sehnel gam sungah Pasian in meii (leh meipi) tawh a makaihna thu Gamlakvakna sungah kimu hi. Sehnel gam sungah Pasian in a mite a ompihna a lahkhiatna dingin meii zang zel hi. Gam 9:15-23 sunga kimu bangin, biakbuk (tabernacle) a kibawl khit uh ciangin tua mun pen meii in tuam a, nitak pan zingsang dong meikuang (fire) tawh kibangin biakbuk tungah om hi. Tua meii, a omna tung uh pan a paikhiat ciangin amau zong kalsuan khia uh a, meii a tat/kikhinloh ciangin amau zong giahphual satin tawlnga uh hi. Pasian in meii zangin Israel mite makaih hi. Khatvei leh meii pen biakbuk tungah ni tawmcik bek a om hun om a, khatvei leh zankhat bek omin, zingsang ciang kikhin a, Israelte in tua meii zui-in kalsuan uh hi. Sun ahi a, zan ahi zongin biakbuk tung panin meii a kilakkhiat hunhun pen amau zong a paikhiat hun ding uh hi pah hi. Buaihuai mahmah ding Thumanna kici pen a nuam hi lo a, haksa mahmahin, ahi zongin manpha hi. Israel mite sehnel gam sung-a a nuntakzia uh panin zong kimu hi. Meii pai leh pailoh-ah amau zong a paikhiat ding leh paikhiatloh ding uh kinga ahih manin buaihuai mahmah ding hi. Mipi 20,00,000 kiim, sun in paikhia ding maw zan in paikhia ding, kha khat om ding maw, kum khat om ding? Bangmah a kithei lo a nuntakna uh pen baih ding hiam? A lup uh ciang zana paikhia thei dinga a kigin uh kul ding a, zing tho in nasep sawm leh uh zong kiginden kul ding hi. Huan bawl ding maw, tui bangzah tawi khol ding, naupangte vakmang kalin pai kul kha leh… ngaihsutna tampi tawh kiginkholh den kul ding hi. Tua ci banga a nuam het lo ding Pasian makaihna tawh kalsuan uh a, thumanlohna hangin Pasian dan piakna in sehnel gamah kum sawmli sung bang a om uh hangin, tua mawhna hanga lametbei leh kuncip mai loin, Kanan gam a tun theihna ding un Pasian makaihna a zui kik diamdiamte suan le khakte Kanan gam tung uh hi. Tuhun bang hi leh… Tuhun in bel tua bang dana Pasian in a tuam vilvel a hong makaih ding bel uphuai lo hi. Ahi zongin tua hun lai in eite om hi leng phun bekbek tawh i hun i beisak kha diam? ‘Pasian thu hi, Pasian deihna hi’ cih thei napi in zong i phunphun diam? Pasian thu zui a, kiging den, ahih kei leh kiginloh lai a paikhiat vatvat pen cimtakin mun khatpeuh ah i tawlnga mai diam? Pasian thu leh makaihna sangin eima deihna liansak lua-in, i suan le khakte Kanan gam lut loin sehnel gamah i khang/minam i beisak nuamzaw mai diam? Makaite mawhsakin, nu leh pate demin, hong makaih dan uh leh a gamtat dan uh haihuai i sa diam? Pawlpi kalsuanna khatpeuh ah, kalsuanna khatpeuh (a haihuai tawh a kibang phial zong), a nuam kei phial zong, Pasian deihdan makaihna ahih ding thupi a, kimakaihzia pen kimakaihna dinga Pasian in hong piak Lai Siangtho tawh a kituak hiam cih pen i ngaihsutden ding deihhuai hi. A nuam, a haksa lo bekbek deihna hangin pawlpi kalsuanna pen Pasian thu tawh a kituakloh hun bang om thei hi. Tua banah mipite mahmah zong, pawlpi kalsuanna pen Pasian thu tawh kituak napi ei deihna tawh a kibatloh manin kiphunphun thei hi. “Ka ngaihsutna pen Pasian thu tawh a kituak mah hiam? Ka pawlpi leh ka pawlpi mite, ka makaite ka muhdan zong a dik mah hiam?” cih pen ngaihsut ding thupi hi. Thumanna gah Thudik, thuman tawh thumang taka nuntak pen a gah om teitei a, limci hi. Tua mah bangin a hoih lo a gamtatna in zong gah nei a, limci lo hi. Israel mite in Pasian thu a manlohna uh hangin sehnel gam sungah kum sawmli vakvaiin, Izipt a piang Joshua leh Kaleb lo siah a sihkhit uh hangin, Pasian thu nial paisuak lo uh ahih manin a suan leh khakte uh Kanan gam tung veve uh hi. Thumang loin a siat gamtat nilohte suan le khakte pen beimang lel hi. Mihing i hih manin khatvei leh khialin, mawhna-ah i kibual hun om hi. Ahi zongin, tua bang nuntakna pen ‘hoih lo hi, Pasian in deih lo hi,’ cih thei a, Pasian deihna a zong a, Amah a zuan mite pen leitunga ‘mi hamphate’ ahi uh hi. A gah pen amau tektek in zong a saan uh om ding a, a suan leh khakte in a saan zong om ding hi. Pawlpi sung khawngah zong, haksatna tampi thuak a, Pasian leh a pawlpi ading a gentheihna a thuak, a citak mahmahte pen Pasian in a gah a lohsak hun pen kimupah hi. Ahi zongin, thumanna pen thuakna leh supna tawh kigamla het lo hi! Ahi zongin… Pilvanhuai Pasian thu pen a thupipen leh a kisampen ahih manin gen leh pulak tampen hi a, kikhemna tamna pen zong ahi hi. Tuhun mah bangin, Jesu hun lai pekin zong upna paikhial leh Pasian thu tawh a kibang mahmah thu tampi om a, tuate lak panin pilvanhuai mahmah hi. Mi pawlkhat in ‘… tua Pasian’ Kha Siangtho [no sunga om] na dahsak kei un’ (Eph 4:30) siksanin, amau utdan leh hoihsakdan, amau pumpi deihna leh kalsuanzia bek hoihsa-in, Pasian thu zul-ah Pasian minin na sem uh hi. Tua bang mite in thu a gen uh, ahih kei leh na khatpeuh a sep uh ciang mi a zawhnopna uh hangin Kha Siangtho dahsakloh ding thu lim gen mahmah thei uh hi. Tuate in thuzawh honpi khat nei-in, pawlpi khang mahmah leh mite in thugen siam a sak mahmahte khawng zong hi zawsop thei uh a, ahi zongin thudik leh Pasian thutak taktak hi lo thei hi (2 Pet 2:1-3). Cihnopna-ah, Pasian thu pen thupi lua ahih manin kikhemna dingin zong zat baihpen, mi in zong um baihpen hi. Makaite thu man ding cih hangin Pasian thu tawh a kituak kei leh man ding cihna hi tuan lo hi. Mi pawlkhat in amau meetna ding hiam, gualzawhna ding hiam, thahatna ding hiamin makaite thu man ding hi, ci pongmawk thei uh a, tua hunah kha tuamtuam thu khawng zangin, ‘Kha Siangtho dahsak kei unla, ka gen bangin gamta-in, ka thu zui un’ zong ci thei uh hi. Tuate thu man pen Kha Siangtho lungdamsakna hi loin, dahsakna hizaw a, Lai Siangtho in, kha khempeuh um lo ding leh Pasian kiang pan hong pai taktak mah ahi hiam cih kantel (test) dingin hong hilh hi (1 John 4:1). Khristian nuntakna pen ukcipna gam Izipt pana a suakta Israelte nuntakna mah tawh kibang hi. A haksa mahmah Tuipi San kan khit ciangin zong gaal le sa bei loin, tui duh dangtakin haksatna tampi mah nawk toto-in Izipt gam a ngaih mahmah hun uh bang zong tam mahmah hi. Tua mah bangin Jesu sisan sungah mawhna tawh kisawp khit ciangin buaina, ze-etna, leh haksatna a bei pah ding hi zenzen lo hi. Khristian kici, mi piangthakte pen vantungmite mah banga siangtho leh paubanna om lo hi zenzen lo hi. Gal do ding, haksatna nawk ding, gimna thuak ding pianthak ma sangin tamzaw thei a, nidang a kiniamkhiat thei lote zong Jesu min hangin kiniamkhiat kul a, nidang a lauhnei lote zong Jesu hangin a gap lo leh a guallel a panhun om a, kha khempeuh sang lo dingin sittel a kisap hun leh nidang a thumang lote zong Jesu hangin thuman kisam hi. Tuate pen Pasian deihna ahih manin ama mite in sep/zuih ding hizaw hi. Thukhupna Gam 9:23 sungah, “Topa’ thupiakna tawh amaute in giahphual sat uh a, Topa’ thupiakna mah tawh amaute dingkhia uh hi. Topa in Moses a thupiak bangin amaute in Topa thu mang uh hi” cih kimu a, thupi hi. Tung lam panin Pasian in Moses tungtawnin a thupiak zui diamdiam uh hi. Kamsang dang, mangmu thei tuamtuam, kamsang zuau thei tuamtuamte thu zui loin, a minam siatna ding, Pasian tawh a kizopna a siatlohna dingin Moses tungtawna thu omte mang uh hi. I pawlpi sungah zong, a ut peuh, a man peuh, a lawp vat khatpeuh, mu le mal nei meel lote thu peuh i zui kha hiam? Lai Siangtho, Pasian thu tawh a kituak leh kituakloh kantel lopi in Kha nasep, Kha Siangtho sawlna ciin i zuizui kha hiam? Kha Siangtho dahsak ding i lau luatna hangin Jesu pumpi (pawlpi) sung buaiin, Kha Siangtho taktak i dahsak kha zawsop hiam? Thumanlohna hangin a dahsak theih mah bangin, thumaan lo manna hangin zong Kha Siangtho dah thei veve hi. Lai Siangtho in Khris a kineikhem (Mat 24:5), kamsang kineihkhem (24:11; 2 Pet 2:1), mi’ inn a hawhsim khiankhianin thuhoih lo tawh mi a thuzawh sawm (2 Tim 3:6) om ding ahihna leh tuate thu zui/mang lo dingin hong hilhkhol khin hi. Thumanna pen a nuam hi lo hi. Guallelhna tawh kibat hun om a, maizumna peuh tun thei zawsop hi. Ahi zongin, Khristian nuntakna pen kiniamkhiatna, hong makaih leh hong uk Pasian deihna banga nuntakna hizaw hi. Mihing lamah a haihuai hun om a, nuihsan, pampaih leh bawlsiatna thuak hun zong om thei hi. Ahi zongin tuate pen mihangsan pai masate leh Jesu mahmah in zong a thuak hi a, tuate tawh kipelh sawm a, bangmah seploh pen Khristiante nuntakzia ding hi lo hi. Bangbang i sem a, koikoi-ah i om zong, Pasian deihna kan a, Ama deihna banga thumang taka kalsuan ding pen a thupi pen ahi hi. Tua pen ‘nuntakna’ ahi hi. Sehnel gamah Isreal mite kiginkholhden a kisap mah bangin, a hun leh ni kihei lo, Jesu hong paikik Ni hunah Amah tawh a lungdamkhawm dingin Jesu in kigingden dingin hong vaikhak a (Mat 24:36ff), thumangte thaman pen vantunggam hi ding a, thumang lote ngah ding pen tawntung gimthuakna hi ding hi. ~ T. Sawm Lian, Daihna Cabin

Tulaai leitung thu thang tuamtuam

Tulaai Leitung Thuthang Tuamtuam Updates April 30, 2016 · Kawlgam sung kilemna kip aom theih nading in lunggulh natawh Kawlgam Leikha Maangpi Pi Suut Cing leh Kawlgam kilemna encik pawl ahi JMC te April 27, 2016 ni sun in kimukhawm uha, Kawl Gaalkaap Mangpi teng zong Pi CIng in nuisak zihziah ahihman in namtui mahmah hiding in deihbawl hang. Kawlgam Kilemna Vaaihawm pawl ahi MPC kiciantak in puahpha in Mikim kihel Kilemna tawh kisai Pawipi khat asawtlo in bawlding ci in Pi Suut Cing in genkhia hi. Pu Thang Lian Pau ZRA/O zong Pi Suut Cing tawh kilawmta mahmah ahihciang tutung bel ongkihel kha ding in lam en hang. VOA · North Korea gam kum 36 vaal bang auk cip ta ahi Worker’s Party ten ongtungding May 6,2016 niciang Party khawmpi nasiatak in bawlding ci in taangkokhia uhhi. Ahizong in bangteng bawlding cih gencianna neilo uhhi. May 6,2016 ni ma in A (6) veina Nuclear thautang lotsinna neizel ding ci in South Korea gam te in alau thawnna uh pulaakkhia uhhi.VOA · Jordan gam te in Rock Music band te in show khawng abawl uhciang Gay-Akeu or Numei-Pasal te lasak nawnlo ding in ci in April 27, 2016 ni in kipsakna khamna bawlta uhhi. Tua hang in Friday ni a nasaitak kibawlding Mashrou Leila in lasakpawi kikhawlkik sak hi. Zomi te lak ah omkhol khol leh deihhuai san in muthadah ngaaungaau uh.BBC · Kenya gam Nairobi khuapi sung ah guahtui tamluatna hang in April 30, 2016 ni in Inn 15 kicim a mi 15 sang atawmzawlo sipah in tampi tak kivuk nelh a mi 130 kumpi thunei ten thaaikhia man ci in gen uhhi.VOA · US gamte Gaalvanleeng pua Tembaw pi Hongkong tuikulh tung ah hawhding a Tuipi tung a paidede China te in April 30, 2016 ni in khaktan giap in luutsak lo uhhi. Bang thu bangla oma khaktan cih kithei naailo ci in Pentagon thunei ten gen uhhi. Hih Tembawppi tung ah Nasem mi 5,000 bang tuang in Gaalvanleeng 75 leh Helicopter 25 kihel ci uhhi.BBC · Syria gaalkaap te in April 30, 2016 ni in Ellepo khuapi Nahtang Um 30 veitak mawkkhiat zanzan uh ahihman in mi 5 sipah I 50 liamna tawh zato ah kilumsak ci uhhi. April 22 pan kiniciang Syria kumpi te ngongtatna hang in mipi 250 bang in anuntaakna beilawhta ci in Syria gam encik pawl in genkhia uhhi.CNN Lungdam